يا ترى إيه المحفزات اللي بتقدمها الحكومة المصرية دلوقتي عشان تقدر تجذب أكبر عدد من المستثمرين للسوق المصري، وايه قصة الشركة النمساوية اللي عايزة تضخ فلوسها في السوق المصري دلوقتي، وفي أي مجال، وامته هنشوف شغلها موجود على أرض الواقع.. هنقولك كل التفاصيل في الفيديو ده. 
 

في الساعات الأخيرة، المهندس كامل الوزير، نائب رئيس مجلس الوزراء للتنمية الصناعية، وزير الصناعة والنقل، عقد لقاء مع ممثلي شركة نمساوية متخصصة في الصناعات الخشبية، وكان بهدف بحث خطط الشركة المستقبلية في السوق المصري.

والاجتماع ده، شهد استعراض خطة الشركة لإقامة مصنع على مساحة تتراوح بين 300-400 ألف متر مربع لتصنيع مادة SPC المستخدمة في الأرضيات وتجاليد الحوائط، وده بالإضافة لعقد شراكة مع شركة "نجع حمادي المتخصصة في إنتاج وتصنيع أخشاب الفايبر بورد" لإقامة مشروع بمصنعها القائم على مساحة 150 ألف متر مربع لتصنيع أخشاب MDF.

وطبعا، الأخشاب دي هتستخدم في صناعة الأثاث مع صيانة المعدات الحالية للمصنع وإنشاء خط إنتاج جديد، وتشغيل العمالة الموجودة بالمصنع الحالي.

ومن هنا، قال الفريق كامل الوزير، إن الحكومة المصرية حريصة على تقديم كافة سبل الدعم للشركة لتعزيز استثماراتها في السوق المصري، ومش بس كده لأ ده كمان بتقدم تيسيرات كبيرة في استخراج التراخيص الصناعية للشركة، عشان تسرع وتيرة إنتاجها، خاصة وأن كل المواد الخام اللي هتعتمد عليه الشركة في التصنيع هتكون محلية بنسبة 100%.

كمان، تم تحديد الموقع المناسب لإقامة المصنع بتاع الشركة النمساوية، وهيقام عليه مصنع مادة SPC مع مراعاة اختيار موقع بالقرب من الموانئ المطلة على البحر المتوسط زي مينا الإسكندرية وكمان مينا جرجوب، وده طبعا عشان يسهل  تصدير منتجات الشركة للأسواق الخارجية.

والاجتماع ده حضره الدكتور شريف فاروق وزير التموين والتجارة الداخلية، واللي أكد إنه جاري الانتهاء من المفاوضات الخاصة بصفقة الشراكة بين شركة كرونوسبان النمساوية وشركة نجع حمادي المتخصصة في إنتاج وتصنيع أخشاب أو الفايبر بورد، والتابعة لشركة السكر للصناعات التكاملية والشركة القابضة للصناعات الغذائية التابعتين لوزارة التموين والتجارة الداخلية، وده طبعا عشان يحقق العائد الاقتصادي المنشود للطرفين.

أما رئيس الشركة النمساوية في منطقة الشرق الأوسط وآسيا، أكجن أوكاي، قال إن الشركة بدأت إنتاجها في النمسا سنة  1897، وعندها 41 مصنع حول العالم، وكمان بتصدر منتجاتها لحوالي 123 دولة، وبتقوم الشركة دلوقتي بإنتاج ألواح خشبية بإجمالي 18 مليون متر مكعب سنوياً.

وكمان، بيشتغل في الشركة دي حوالي 14 ألف موظف، كمان بتعتمد الشركة في إنتاجها على مصادر الطاقة النظيفة، وبتنتج أخشاب بدون انبعاثات كربونية للحفاظ على البيئة.

عشان كده، الشركة النمساوية حريصة على الاستثمار في السوق المصري، عشان تستفيد من المزايا والحوافز الاستثمارية المتاحة في مصر حالياً، وده كله بيساهم بالتأكيد في نجاح تجربة الشركة في السوق المصري، عشان تكون نافذة لها للانطلاق إلى أفريقيا.