مصر حاليا بدأت تشتغل بخطط ثابتة وواضحة لتحويل مصر لمركز اقليمي لتبادل الطاقة، وفعلا في الفترة اللي جاية هتكون في مشروعات كتيرة لاستغلال الطاقات النظيفة في مصر... ياتري مصر بتعمل اية في النقطة .. واية اللي مصر مستهدفه تحققه في مشروعات الطاقة في الفترة اللي جاية.

الدولة المصرية عندها خطة طموحة لتحويل مصر لمركز اقليمي لتبادل الطاقة، وكمان الخطة دي هتقلل الاعتماد الحكومي علي مصادر الطاقة التقليدية واللي هيا محطات توليد الكهرباء باستخدام الغاز الطبيعي والمازوت وغيرها من الوقود الأحفوري اللي بتستخدمه مصر لتشغيل محطات توليد الكهرباء، لكن الفكر والاتجاه في الفترة اللي جاية هيكون مختلف تماما، وهيكون التوجه لبناء محطات توليد طاقات نظيفة من طاقات الشمس والرياح.

طيب استراتيجية مصر لبناء محطات توليد الكهرباء من الطاقة النظيفة بتستهدف الوصول لكام؟.
مصر حاليا عندها خطة أنها توصول بحجم بتغطية نسبة 42 في المية من الطاقات المستهلكة من الطاقة النظيفة واللي بتكون مصدرها الشمس أو الرياح في سنة 2030، وكمان مصر بتستهدف الوصول بتغطية حجم الاستهلاك المحلي من الطاقة بنسبة 60% من الطاقة بحلول 2040، ودي نسبة كبيرة بتستهدف مصر تحققها وهتدخل علي الشبكة الموحدة للكهرباء وهتكون بديلة للطاقات الموجودة حاليا واللي بتنتجها محطات توليد الكهرباء واللي في المقابل بيكون لها عوامل سلبية ومناخية من انتاج ثاني اكسيد الكربون واللي مصر مستهدفة تخفضه لنسبة كبيرة في الفترة اللي جاية .

خطة مصر للاعتماد علي مصادر الطاقة الجديدة بتستهدف الوصول إلى صفر انبعاثات ثاني أكسيد الكربون الناتج عن توليد الكهرباء، وبتستهدف الوصول بإجمالى القدرات المولدة من الطاقات الجديدة والمتجددة ومن الطاقة النووية إلى 123 ألف ميجا وات إجمالى قدرة الشبكة الكهربائية بحلول 2040.
وزارة الكهرباء والطاقة المتجددة أعلنت أنها هتضيف 64 ألف  ميجا وات من الطاقة الشمسية والرياح وده بيمثل 60% من إجمالى القدرات البلي هيتم اضافتها على الشبكة الكهربائية بحلول 2040، ومصر بتستهدف إضافة 24 ألف ميجا وات من الطاقة الشمسية و40 ألف ميجا وات من طاقة الرياح.

وعلشان نكون عارفين أن البرنامج النووي المصرى لتوليد الكهرباء من محطة الضبعة النووية واخذ نسبة كبيرة جدا من الاهتمام  في استراتيجية مصر للطاقة 2040، واللي بستهدف انتاج قدرات كهربائية هتوصل لـ4800 ميجا وات من الطاقة النظيفة الخضراء اللى بتتميز بصفر انبعاثات ثاني أكسيد الكربون وهتوفر مليارات الجنيهات ودي عبارة عن تكلفة الوقود المستخدم لإنتاج نفس القدرات من محطات توليد الكهرباء واللي بتعتمد على الوقود في التشغيل.

استراتيجية مصر للطاقة 2040 بتستهدف كمان خلق مزيج متنوع من الطاقة هيقل فيه الاعتماد على الوقود التقليدي وهيزيد الاعتماد على الطاقة المتجددة، وهتكون في الخطة معتمدة علي تكنولوجيا الضخ والتخزين واللى هتضيف للشبكة الكهربائية 2400 ميجاوات، وده غير القدرات الكهربائية واللي هتوصل لـ2000 ميجا وات من الطاقة المائية.

وعشان تبقي عارفين اللي بيملك الطاقة بيملك القوة قي المنطقة لأنها أساس اي تطور وتنمية واقتصاد قوي وبمعايير  ومقاييس الطاقة في العالم مصر  في طريقها تكون قوة عظمي في قطاع الطاقة بالمنطقة