يا ترى إيه اللي بيحصل في قطاع الزراعة في مصر؟ وإيه اللي خلّى القطاع يتغير بالشكل ده؟ وهل ممكن نحقق الاكتفاء الذاتي في بلد تعدادها فوق الـ 100 مليون؟ طيب إزاي المشروعات القومية اللي بتحصل دلوقتي هتأثر على حياتنا اليومية وأسعار المنتجات في السوق؟

فيه إنجازات غير مسبوقة حصلت في القطاع الزراعي المصري في عهد الرئيس عبد الفتاح السيسي وتحديداً على مدار الـ 10 سنين اللي فاتوا مشروعات قومية ضخمة مش بس لزيادة الإنتاج لكن كمان لتحقيق الاكتفاء الذاتي وتأمين غذاء المصريين في ظروف صعبة وتغيرات عالمية

بداية من مشروع المليون ونص فدان، اللي أطلقه الرئيس السيسي سنة 2015 وكان الهدف منه استصلاح الأراضي الصحراوية وزيادة الرقعة الزراعية، وده كان بداية نقلات نوعية في قطاع الزراعة.. المشروع ده مش مجرد زراعة، لكن بناء مجتمعات عمرانية جديدة حوالين الأراضي الزراعية دي.. عشان نستغلها في الزراعة والتجارة وتكون مناطق صالحة للعيش في واحات زي الفرافرة، والمناطق دي موزعة على 13 منطقة في 8 محافظات منها قنا وأسوان وجنوب سيناء والجيزة. وبالدراسات المتعمقة، اتحطت البنية التحتية المناسبة عشان تكون مستدامة وتساعد في تأمين موارد الغذاء

وفي نفس السياق جت مبادرة القرية المنتجة اللي بتستهدف تحويل القرى من مجرد مستهلكة لإنتاجية ودي اتنفذت بالتعاون مع وزارتي الزراعة والتنمية المحلية عشان توفر فرص عمل للشباب وتستغل الموارد المحلية وتدعم الصناعات القائمة على المحاصيل المتاحة، وده كله بهدف زيادة دخل الأسر الريفية

ونروح لإنجاز تاني حققناه في الصادرات الزراعية اللي تخطت الـ 4 مليارات دولار ووصلت إلى 6.9 مليون طن منذ بداية 2024.. وده إنجاز ضخم مقارنة بالأعوام اللي فاتت.. وكل ده بيحصل مع جهود الدولة لدخول أسواق جديدة وكبيرة زي أمريكا اللاتينية والصين ودول في أفريقيا وده بيعني دعم الاقتصاد المصري عن طريق منتجاتنا الزراعية اللي بقت دلوقتي على أرفف الأسواق العالمية

ولازم نذكر المشروع القومي للغذاء اللي بيهدف لإنشاء 100 ألف صوبة زراعية.. يعني، إحنا مش بس بنزرع في الأرض العادية لكن بنحاول نستغل كل متر مربع في زراعة منتجات عالية الجودة وخالية من الملوثات زي الخضروات والفاكهة، وده بيساهم في رفع جودة الأكل اللي بنستهلكه يومياً

كمان في مشروع مهم جداً وهو كارت الفلاح الذكي اللي بيسجل بيانات المزارعين والأراضي إلكترونياً وده بيساعد في وصول الدعم لمستحقيه مباشرة ويضمن حق الفلاح في مستلزمات الإنتاج، وبيقلل التلاعب ويساعد الدولة في دعمهم بالشكل الأفضل

وما نقدرش نتكلم عن قطاع الزراعة بدون ما نذكر مشروع الدلتا الجديدة اللي بيعتبر من أكبر المشروعات الزراعية النهاردة وبيهدف لاستصلاح وزراعة أكثر من مليون فدان.. المشروع ده بيكلف مليارات، وهدفه مش بس زراعة الأراضي، لكن كمان بناء مجتمعات زراعية كاملة حوالين الأراضي دي

وعلى مستوى تطوير إنتاج البذور والتقاوي فيه تطور كبير في إنتاج تقاوي القمح والقطن وتوفير أصناف جديدة عالية الإنتاجية ومتحملة للظروف المناخية عشان نضمن استمرارية إنتاج المحاصيل المهمة وتلبية احتياجات السوق المحلي

وفي مجال الثروة السمكية، مصر بقت النهارده الأولى أفريقيا والسابعة عالمياً في إنتاج السمك، بفضل مشاريع الاستزراع السمكي زي بركة غليون وغيرها وده خلى الأسعار تقل في السوق ويساعد في تنويع مصادر البروتين للمواطنين

في النهاية كل المشروعات دي هي جزء من رؤية متكاملة بتحاول توفر الأمن الغذائي، وترفع مستوى المعيشة، وتدعم الاقتصاد بشكل غير مسبوق