حرص المخرج أحمد البنداري على تحذير صناع الفن من التعامل مع الفنان محمد سعد، وذلك بسبب قيام الأخير بسرقة فكرة فيلم سينمائي منه، وفقًا لما ذكره البنداري خلال منشور له عبر حسابه الشخصي على موقع التواصل الاجتماعي فيسبوك.

أحمد البنداري يحذر صناع الفن من التعامل مع محمد سعد

وكتب أحمد البنداري في منشوره الذي يرصده موقع تحيا مصر: فيلم الدشاش ده اصلا اسمه كعب داير وكان مترشحله نجوم تانية يا ريتني كنت روحت لأي حد فيهم.. المهم عن طريق صديق مشترك وديته لمحمد سعد تحت اسم "الحاوي" و كان سعد ترشيحي انا رغم تحذير ناس كتير من التعامل مع سعد كنت مصمم عليه و شايفه نقلة ليا و ليه.. المهم بعد ٣ شهور شغل عليه من اللف على المنتجين بالتوازي شغل على التصور البصري كله directors treatment و visual file و شكل الشخصيات و اللبس و الديكور و طريقة الإخراج و المونتاج و ال color pallet و ستوري بورد كاملة علشان اروح للنجم بتصور كامل للفيلم مش رايحين نهزر يعني.

وتابع: المهم بعد مكالمات و مواعيد كتير روحتلة البيت انا و المؤلف (اللي مش بالوم عليه لأنه بقاله كتير مستني فرصة من نجم المفروض انه كبير) المهم.. المفروض السيناريو كان عاجب سعد جداً و متحمسله جداً خصوصاً انه كوميدي دراما مش فارس كوميدي زي كل افلامه.. و كان في شركة كبيرة و منتج كبير موافق على الفيلم بحذر طبعاً لسمعة محمد سعد مع المخرجين انه لكني طمنتة وقولتله ماتقلقش سعد عاجبه الفيلم و متفقين على الخطوط العريضة كلها و كان شرط سعد الوحيد ان المنتج مايعترضش على اجره الكبير.. ده كان كلامه بالحرف.. المهم المنتج ده كلم سعد و اداله اكتر من ميعاد و سعد لغى كل المواعيد لأسباب مختلفة.

أحمد البنداري يكشف كواليس اتفاقه مع محمد سعد الذي لم يكتمل

واضاف أحمد البنداري: لحد ما في يوم كلم هو المنتج و قاله ان الفيلم مش عاجبه و ان السيناريو ضعيف وانه عايز يبقى يحدد معاه ميعاد على فيلم تاني (لما نجم المفروض كبير يقول لمنتج ان الفيلم اللي بقالي شهور مجننه معايا فيه انه فيلم ضعيف و وحش هو قتلي فرصي مع المنتج ده وقتها) المهم.. لما المنتج كلمني وقالي استغربت جدا لأن ده عكس كلامه ١٠٠٪؜.

واستكمل: المهم بعدها كلمتة قالي نفس الكلام انه الفيلم مش عاجبه ماحبتش اطول في المكالمة خصوصاً ان ده حقه انه يعجبه فيلم او مايعجبوش مع انه مقالش كده من الأول بالعكس و الحمد لله على نعمة التكنولوجيا الواتساب كله موجود.. بس الغريب اني اكتشف بعد كدة ان الدشاش هو الحاوي مع مخرج تاني و منتج تاني ليهم كل الإحترام و التقدير و التمنيات بالتوفيق.. مع الفارق في نجم كبير جدا مش هقول اسمه روحتله بفيلم.. شوفت منه صراحة و وضوح في اللي عاجبه و اللي مش عاجبه و قاري الفيلم كويس مش حد قاري و حاكيله الفيلم ده غير التزام رهيب في المواعيد مع انه حقيقي مش فاضي لحد اخر ٢٠٢٥ يعني ممكن مانشتغلش الفيلم ده اصلاً مع بعض لكن عرفني ليه الراجل ده محافظ على نجوميتة بقاله ٢٠ سنة تقريباً لأنه بيسمع للأخر و بيقرا كويس و ملتزم لأقصى الحدود.

أحمد البنداري لصناع الأفلام: بحذركم من التعاون مع محمد سعد

واختتم أحمد البنداري منشوره: ربنا يوفق الجميع و ده كان تحذير لأي صانع افلام من التعامل مع محمد سعد من غير ما يكون مأمن نفسه و مجهوده ١٠٠٪؜ لأن مجهودك و التزامك و صدقك دول شرفك في الشغلانة دي.. وهما اللي هيخلوك تعرف تحط صوابعك في عين التخين و تقوله كده غلط و عيب ومايصحش كده انت المفروض كبير و الكبير مابيلفش و يدور.. عموما انا بعد الموقف ده و موقف شبيه حصلي السنة اللي فاتت بدعي و بقول يا رب ٥ مليون دولار و نبطل شغل.