يبدو أن أزمات إمام عاشور، لاعب وسط النادي الأهلي ومنتخب مصر، مسلسل لا تنتهي حلقاته حيث تصدر عناوين الصحف بسبب الأزمات التي يثيرها داخل وخارج الملعب، إذ دخل في مشادة مع محمد الشناوي قائد الفريق، وذلك بعد اعتراضه على عدم مشاركته في المباراة الأخيرة أمام استاد أبيدجان الإيفواري ضمن منافسات دوري أبطال إفريقيا.وعلق الإعلامي أحمد سالم على أزمة إمام عاشور في النادي الأهلي ومشادته الأخيرة مع محمد الشناوي قائد الفريق قائلا: « من وقت ما راح إمام عاشور النادي الأهلي وطلعت مبررات كثيره منها حديث المهندس عدلي القيعي واللي بالمناسبة كانت مبررات ساذجة جدا واللي ناس كتيرة خدتها مادة للسخرية.. لكن في الآخر قولنا إحنا مش طرف كنادي الزمالك بالقصة، لكن المشكلة أن كل ما بتحصل حاجه تخص إمام عاشور أو حتى كهربا بتلاقي تلقيح على نادي الزمالك. وبشكل في منتهى الرخص وإحنا مش طرف في أاي حاجة».

وأضاف :« من كام يوم إمام عاشور عمل مشكلة كبيرة واتغرم مليون جنيه، والدنيا انقلبت والقنوات حاولت تلطف الدنيا ويجيبوا 2 ليمون واللي كلم حماه واللي كلم نسايبه، حاولوا يلموا الموضوع إعلاميا، اللاعب اعتذر والزمالك ملوش علاقه بالقصة.. ولقينا تلقيح كالعادة على الحتة الثانية أنت عايز ايه يا إمام عاشور من الزمالك؟ أنت اسمك اتعمل في الزمالك وروحت المنتخب واحترفت بسبب الزمالك وانت اللي مستحملتش ورجعت وطلعت قولت في قناه الأهلي انك كان نفسك ترجع الزمالك ولما ملقتش عرض روحت الأهلي يبقى الزمالك وحش في ايه؟».

 وأكمل: « هو انتوا صدقتوا نفسكم في قصه إمام عاشور بتاعه هنربيه عندنا وعندكم دي؟ ما تربوه براحتكم إحنا مالنا وتحطوه في حضانة أطفال حتى .. ما تعملوا كده من غير تلقيح على الزمالك، كهربا وإمام عاشور مشاكلهم عندكم أكبر بكثير لما كانوا في الزمالك.. إمام عاشور قعد سنة احتياطي وبيلعب في كل المراكز ولا بيفتح بوقه ولما غلط مرة أتوقف.. لكن لا عمره عمل مشاكل ولا راح اقسام ومحاكم ولما مرة صبغ شعره معتبشي القائمة وكان موضوع تافه وكان ماشي على العجين ميلخبطوش». 

 وواصل أحمد سالم حديثه قائلا : «كابتن أسامة حسني سايب كل المصايب اللي عنده ويقولك هتعملوا ايه مع مصطفى شلبي اللي طلع زعلان من التغيير.. وأنت مالك يا أخي ما تخليك في حالك وفي فريقك هو حد كلمك أنت مالك أنا أعمل ايه، محدش يحمل جمهور الزمالك أخطاء حد .. محدش قال للاعب يروح يضرب واحد في مول علشان هو مضغوط من الجماهير ولا قال لكهربا يغلط في حد ويتغرم علشان مضغوط» .

وأختتم : «حاسبوا لعيبتكم براحتكم وغرموهم مليون جنيه... محدش يدخلنا في القصة مش بتاعتنا دي ولو مش عارفين تبرروا مشكلتكم في التعاقد مع امام عاشور دي مشكلتكم انتم مش احنا بلاش شغل بتاع الحته الثانيه والأسطوانة المشروخة دي غير مسموح بالإساءة لنادي الزمالك ومش هنسكت على الكلام ده».