الأربعاء 13/نوفمبر/2024 - 12:55 ص

استغاث إبراهيم محمد والد الطفلة أسيل، والمقيم في مركز فاقوس التابع لمحافظة الشرقية، لتشخيص حالة ابنته أسيل 7 سنوات، وعلاجها من مرض سرطان المخ، التي تحتاج لعلاج يتكلف آلاف الجنيهات.

 أب يستغيث لعلاج ابنته من سرطان المخ 

وقال والد أسيل في تصريحات خاصة لـ القاهرة 24، إن ابنته كانت سليمة عند الولادة، ولم تشتكي من قبل إلا أن صحتها تدهورت تدريجيًا، حتى تم تشخيصها بمرض سرطان المخ مما يتطلب منه رعاية طبية متخصصة وتكاليف علاجية باهظة. 

 وتابع: حالة بنتي بدأت تدهور في أول يوم مدرسة، وجالها قيء وتعب، فروحنا لدكتور باطنة قال التعب ده بسبب مشكلة من المخ مش المعدة، ولجأنا لدكتور مخ وأعصاب وتم تشخيصها بمرض سرطان المخ بعد ما عملنا أشعة رنين فاكتشفنا وجود ورم على المخ. 

وأكمل: حالة الطفلة يوم عن يوم بتسوء ومفيش جديد خالص ولا أي تقدم وروحت بالبنت مستشفيات كتير لكن كل دكتور بيقولي علاج مختلف، والتكاليف كمان كتيرة عليا ومش قادر أعالجها وأنا في حيرة وحالة بنتي صعبة وبيحصل معاها ترجيع حتى جالها حول في عينيها وعندها تشنجات ممكن 3 أو 4 مرات في اليوم. 

وفي ختام حديثه استغاث الوالد لعلاج ابنته قائلًا: بقالنا شهر ونص ومفيش جديد في الحالة وبنتي تعبانة جدًا والعلاج اللي بتاخده مش بيحققلها نتيجة كويسة، وربنا يعلم أنا جمعت حق الحقن دي إزاي والوضع بيسوء ومش عارف أعمل إيه. 

وناشد والد الطفلة أسيل بالحصول على تكاليف علاج ابنته بسبب تدهور ظروفها وحاجتها للعلاج، معقبًا: نفسي حد يساعدنا في مصاريف علاج البنت لأن حالتها صعبة ومش قادر أشوفها كل يوم بتتعب ومش فإيدي أعمل حاجة لبنتي.