علق الإعلامي عمرو أديب على اعمال الشغب التي اندلعت في هولندا عقب مباراة مكابي تل أبيب الإسرائيلي وأياكس الهولندي في الدوري الأوروبي.

وقال أديب خلال تقديمه برنامج "الحكاية" المذاع على قناة "إم بي سي مصر": "محدش بيؤيد العنف ولا اعتداء البشر على بعض ولكن بردو احنا عايزين العدل، حلوا عنا يا جماعة وسيبوا الناس في حالها وكفاية اللي انتوا عاملينه فيها".

وأضاف: "400 يوم قتل والنهاردة خبر كده قالك مقتل 18 كده دا الخبر وأنت بتسمعه في الراديو والعربية وأنت ماشي بني ادمين دول يا جدعان نساء وأطفال وشيوخ لن ينصلح الحال بأي شكل لا السنادي ولا اللي جاية ولا اللي وراها 70% نساء وأطفال أرقام وإحصائيات واضحة يعني".

وتابع: "النهاردة تسمع الراجل بتاع الأمم المتحدة اللي كان في غزة وهو بيتكلم ازاي الأونروا اللي كانت بتقدم الدعم للفلسطينيين الإسرائيليين قفلوها وقالك مش عارفين نوصل لهم لقمة".

وواصل: "فوق دا كله أنت رايح أمستردام تستفز الناس والناس معندهاش الغضب اللي عندها أنت غضبك أقل من غضبنا كتير، القضية الفلسطينية جوة الوجدان العربي كلم أي حد محدش هيبقي واقف مع الإسرائيلي أبدا إلا لو حد قدر يصل إلى هندسة عقلية غير طبيعية".

وأكمل: "في أجيال من الشباب كان عندنا إحساس انهم نسوا موضوع إسرائيل واللي عملته إسرائيل أنها ربت جيل جديد يكرهها كره بين واللي مشافش شاف واللي مكرهش كره كنا بنقول القضية ماتت أو نامت بصوا العيال 17-18 سنة انت غرست فيهم فكرة الظلم فكرة الاحتلال فكرة القتل

وذكر: “أنا عارف حد هيطلع يقول واللي عملتوا حماس طيب هو الحساب مخلصش؟ الناس دي لا تنتقم الناس دي بتبيد هو لقي القضية مبتتحلش فتتحل ازاي؟ أن ميبقاش في حد وراها، الفكرة بتاعت وطن فلسطيني وبتاع لم تعد موجودة احنا بنتكلم دلوقت عن أحياء فلسطينية شارع أو قسم جامع أو كنيسة هي دي الأراضي الفلسطينية خلاص”.

واختتم: "هل يستطيع نتنياهو أن يقف أمام الكنيست الإسرائيلي ويقول الآن أمنت لكم حياة بلا حرب ومحدش يقدر يقرب لكم؟ ايه الشيء الوحيد اللي ممكن يتعمل؟ الفلسطيني ياخد حقه ويعيش في سلام".