يا ترى ليه الحكومة المصرية بتخطط لطرح صكوك سيادية بالجنية المصري؟ وايه فايدة الصكوك دي؟ وايه الفرق بين الصكوك السيادية بالجنية والصكوك بالدولار؟ والأهم يعني إيه أصلا صكوك سيادية؟

إيه رأيك لو الحكومة المصرية لقت طريقة جديدة لتمويل عجز الموازنة بعيد عن الاستدانة التقليدية؟.. هل سمعت عن حاجة اسمها "الصكوك السيادية بالجنيه المصري"؟و ليه فجأة بقت حديث الأوساط المالية .. خلينا نفهم الموضوع سوا

في خطوة جديدة ومختلفة الحكومة المصرية أعلنت إنها هتطرح صكوك سيادية بالعملة المحلية لأول مرة في الربع الأول من 2025.. الفكرة دي مش جديدة تماماً لأن مصر سبق وطرحت صكوك بالدولار في 2023 لكن الجديد إن المرة دي الطرح هيكون بالجنيه المصري

حد ممكن يسأل ويقول هو يعني إيه صكوك سيادية؟
الصكوك السيادية هي نوع خاص من أدوات التمويل بتستخدمها الدول لجمع فلوس من المستثمرين.. بس الفرق بينها وبين السندات التقليدية إن الصكوك بتكون مرتبطة بمشروعات معينة أو أصول مادية وده بيخليها متوافقة مع أحكام الشريعة الإسلامية.. والصكوك بالجنيه المصري يعني إنها موجهة للمستثمرين المحليين وده هيساعد الحكومة في تمويل مشروعاتها التنموية من غير ما تضغط أكتر على احتياطي الدولار

طب إيه فايدة الصكوك دي؟

الحقيقة الصكوك دي ليها فوايد كتيرة أولها فوايد للاقتصاد خطوة زي دي هتساهم في تقليل الاعتماد على الاقتراض بالدولار.. وده يقلل الضغط على العملة الصعبة.. وفيه فوايد كمان للمستثمرين..  الصكوك دي بتدي للمستثمر فرصة يحصل على عوائد مستقرة من مشروعات حقيقية.. وفايدة برضوا للحكومة.. لأن دي أداة جديدة لتمويل عجز الموازنة خصوصاً مع التحديات الاقتصادية اللي بتواجهها البلد

و ليه الحكومة هتطرحها دلوقتي؟
القرار جاي في وقت حرج.. مصر بتواجه تحديات اقتصادية كبيرة بعد أزمة الحرب الروسية الأوكرانية اللي أثرت على أسعار السلع الأساسية وضغطت على السياحة.. كمان في اضطرابات سياسية في المنطقة قللت الإيرادات الدولارية زي تأثيرها على قناة السويس.. والموازنة العامة لسه بتحاول تتعافى ورغم إن العجز الكلي انخفض لـ3.6% السنة اللي فاتت الحكومة بتستهدف تقليل العجز الحالي اللي متوقع يوصل لـ6%

طب إيه الفرق بين الصكوك بالجنيه والصكوك بالدولار؟

الصكوك بالدولار بتتوجه للمستثمرين الأجانب وعوائدها بالدولار وده بيساعد في دعم الاحتياطي الأجنبي.. لكن فيها مخاطر أكبر لو العملة المحلية انخفضت قيمتها

أما الصكوك بالجنيه فموجهة للمستثمر المحلي وده بيقلل الضغط على الدولار كمان بتساعد في تنشيط سوق المال المحلي وبتقلل مخاطر تقلبات أسعار الصرف

الخلاصة.. طرح الصكوك السيادية بالجنيه المصري خطوة ذكية وجريئة في نفس الوقت..و الحكومة بتحاول تنوع مصادر تمويلها وتقلل اعتمادها على العملة الأجنبية.. بس التحدي الحقيقي هيكون في جذب المستثمرين المحليين للصكوك دي خصوصاً مع الوضع الاقتصادي الحالي