حلم الدخول إلى عصر الاستخدامات السلمية للطاقة النووية واحد من الاحلام اللي مصر بقالها فترات طويلة جدا بتحاول توصلها، وحاليا الحلم علي بعد خطوات من تحقيقه.. ياتري الحلم ده اتحقق ازاي.. واية هيا خطوات مصر لتدشين المشروع النووي لتوليد الكهرباء.. خليكم معانا للآخر وهتعرفوا التفاصيل

مصر من فترات طويلة جدا بتحاول تولد كهرباء من الطاقة النووية، وتحديدا من 67 سنة لما الزعيم الراحل جمال عبد الناصر حاول بكل الطرق يدشن المشروع النووي لتوليد الكهرباء، بس للاسف المشروع متكتبش له يشوف النور، ولكن مع تولي الرئيس عبد الفتاح السيسي، وقعت مصر حلم المشروع النووي في 19 نوفمبر 2015 لما وقعنا الاتفاقية الحكومية لبناء أول محطة نووية لتوليد الكهرباء بمنطقة الضبعة بقدرة 4800 ميجاوات بالتعاون مع روسيا .

الاتفاقية اللي وقعتها مصر مع روسيا، تضمن إقامة أول محطة نووية لتوليد الكهرباء بأرض الضبعة كمرحلة أولى و اللى بتستهدف إنشاء محطة تضم 4 مفاعلات نووية لتوليد الكهرباء بقدرة 1200 ميجاوات لكل محطة بإجمالى قدرات 4800 ميجاوات وبتكلفة إجمالية هتوصل لـ 21  مليار و 300 مليون دولار .

حلم مصر للتحول الي انتاج الكهرباء من الطاقة النووية، شهد تطورات كبيرة جدا، ووقع الاختيار علي منطقة الضبعة بسبب قربها من المياه اللي هيتم استخدامها لتبريد المحطات النووية، وكمان بسبب أنها أرض مستقرة وآمنة، بعيدة عن حزام الزلزال، وده هيضمن أنه ميحصلش تسريب نووي من المفاعلات، خصوصا أنها بعيدة بمسافة 60 كيلومتر عن أقرب التجمعات السكانية، وبالتالي مش هتشكل خطورة بيئية أو مجتمعية علي المجتمعات العمرانية .

طيب ليه مصر اختارت تتعاون مع روسيا لبناء المحطات النووية الجديدة لتوليد الكهرباء؟.

الرئيس عبدالفتاح السيسي قال أن مصر درست على مدار سنة كاملة عروض كثيرة من شركات ودول وظهر أن الشركة الروسية قدمت أفضل العروض، وفعلا الشركة أجرت دراسات متعمقة في مراحل التنفيذ والتشغيل للاعتبارات البيئية واﻷمنية واللي اكدت أن المحطات هتتحمل أي أخطار محتملة حتى لو اصطدمت المحطة طائرة وزنها 400 طن وبسرعة 150 متر في الثانية.

الرئيس السيسي قال كمان إن العرض الروسي كان الأفضل من الناحية الاقتصادية، خصوصا أ اﻻتفاق تضمن وجود برامج تدريب وتأهيل لشباب وعلماء مصر في مجالات توليد الكهرباء من الطاقة النووية، والاتفاق بينص علي وجود المصريين بنسبة 20% من العاملين في المحطة .

وزير الكهرباء والطاقة المتجددة الدكتور محمود عصمت قال إن الرئيس عبدالفتاح السيسي بيتابع مشروع المحطة النووية في الضبعة بشكل يومي، وحريص جدا علي متابعة مجريات التنفيذ والجدول الزمني للانتهاء من المراحل المختلفة من المشروع.

طيب اية الاستفادة اللي هترجع علي مصر من المشروع النووي؟

مشروع المحطات النووية لتوليد الكهرباء هيساعد في تنويع مصادر الطاقة بالاعتماد على مصادر الطاقة النظيفة بدلاً من الطاقة التقليدية، وتكلفة توليد الكيلووات الواحد من الطاقة النووية هيكون قليل جدا مقارنة بالكيلووات من المصادر التانية، خصوصا أن الطاقة النووية مش بتتعرض لتقلب أسعار الوقود زي محطات الطاقة اللي شغالة بالغاز الطبيعي .
لو فاكرين أن دا مجرد حلم اتحقق وخلاص نبقي بنظلم الإنجاز اللي حصل في قطاع الكهربا واللي قدر السيسي يحوله من عجز اللي فائض ومن ظلام كان يستمر بالساعات لتصدير للدول اللي حولينا.