هو إيه اللي بيحصل في الضبعة وإزاي مصر دخلت عصر الطاقة النووية من أوسع أبوابه وازاي مشروع الضبعة النووي هيغير خريطة الطاقة في المنطقة وايه سر رسالة مدبولي الأخير عن المشروع.. خليكم معانا للآخر وهتعرفوا التفاصيل في الفيديو ده 
 

مبروك بقي عندنا محطة نووية عالمية.. دي كانت تهنئة الدكتور مصطفي مدبولي رئيس الوزراء النهاردة للمصريين وإعلان دخول مصر لعصر الطاقة النووية من أوسع أبوابها.. وتقدر تقول إن مصر النهاردة بتكتب تاريخ جديد في مسيرتها الاقتصادية وهتغير موازين الطاقة الكهربائية في المنطقة وهتتحول لمركز عالمي للطاقة وتصديرها لدول العالم.. ازاي دا هيحصل ؟ هنقولك التفاصيل..

شوف ياسيدي الدكتور مصطفى مدبولي اجتمع في الساعات الأخيرة مع المدير التنفيذي لشركة روس أتوم الروسية، إليكسى ليخانشوف، والوفد المرافق له، لاستعراض الموقف التنفيذي لمشروع محطة الضبعة النووية ودي الشركة الروسية المشرفة على تنفيذ وتشغيل المشروع وأكد رئيس الوزراء، أهمية مشروع الضبعة لأنه ولأول مرة الطاقة النووية بتكون جزء من منظومة إنتاج الكهرباء من الطاقة النظيفة مع الأنواع التانية زي طاقة الرياح والسدود والطاقة الشمسية ودا بخلاف انتاج الطاقه الكهربائيه من المحطات التقليدية ومشروع الضبعة بيمثل إضافة عظيمة لموارد الطاقة في مصر وبيتماشى مع مستهدفات الحكومة المصرية لزيادة نسبة الطاقات النظيفة في مزيج الطاقة إلى 42% بحلول سنة 2030.

مدبولي كشف سر الإسراع في البرنامج الزمني لتنفيذ المشروع قبل معاده وهو توجيهات الرئيس عبدالفتاح السيسي، بضرورة تنفيذ المرحلة الأولى من المشروع دون أي تأخير، وأشار رئيس الوزراء أنه يحرص على متابعة تنفيذ المشروع بشكل دوري، وأنه يعتزم زيارة موقع المشروع خلال الفترة الجاية وإن الرئيس السيسي بيتابع مراحل تنفيذ المشروع لحظة بلحظة والرئيس طلب الإسراع في البرنامج الزمني واختصاره لتحقيق عدد من الأهداف الهامة أولها ضمان استدامة تشغيل الكهرباء طوال السنة وتلبية احتياجات التنمية المستمرة في القطاعات الاقتصادية زي القطاع الصناعي مثلا واللي مصر بتتوسع فيه بشكل كبير جدا ومحتاج طاقة إضافية ضخمة ودا غير توفير الدولار اللي بيستنزف في استيراد الوقود لتشغيل المحطات.

 المدير التنفيذي لهيئة الدولة للطاقة النووية الروسية (روسآتوم) أكد أن  الرئيس الروسي بوتين حريص على تنفيذ مشروع محطة الضبعة بأسرع وقت ممكن  وكانت  تكليفاته واضحة في النقطة كي والشركة ملتزمة بتنفيذ هذه التكليفات، ونعمل على تنفيذ المشروع دون تأخير يوم واحد مدير الشركة الروسية قال كمان إن فيه العشرات من الشركات المصرية والآلاف من العمال المصريين اللي شغالين في المشروع.

الحدث الأهم في مشروع الضبعة هو اللي كشف عنه الدكتور مصطفى مدبولي لما قال إن فيه مقترح خاص بشأن دراسة توطين صناعة مكونات بعض المعدات والأجهزة اللي بتستخدم في إنشاء محطة الضبعة النووية في إطار توجه الدولة لتوطين العديد من الصناعات محليا وان مشروع محطة الضبعة النووية بيمثل شراكة إستراتيجية بالنسبة للدولة المصرية في ضوء العلاقات التاريخية بين القاهرة وموسكو

طيب مشروع الضبعة النووي هيضيف ايه للشبكة القومية للكهرباء ؟
بالارقام المشروع هيضيف حوالي 4800 ميجا وات ودا بعد الانتهاء رسميا من تركيب مصيدة قلب المفاعل النووي الرابع و الأخير بالمحطة وهتوفر لمصر 7.7 مليار متر مكعب غاز سنوياً
ولو عرفنا أن مصر بتنتج حوالي 63.190  ألف ميجاوات يبقي المجموع بعد إضافة إنتاج محطة الضبعة 68 ألف ميجاوات تقريبا وبكده مصر عندها وفر حوالي 26 ميجا وات تقدر تصدرهم ودي قدرة كهربائية ضخمة.