يا ترى أزمة الكهربا في مصر انتهت تماما ولا ممكن ترجع تاني؟  وهل ممكن الغاز الطبيعي يبقى المفتاح السحري لحل المشكلة؟ طب إيه الأخبار عن حقل ظهر؟ هو فعلاً هيرجع بقوته كاملة قريب؟

الأسئلة اللى قولنها فى أول الفيديو مش فضول ولا مجرد أسئلة على الورق..  دي أسئلة حياتية بتهم كل بيت في مصر.. وعلشان كده، خلونا نحكي الحكاية من الأول..

حقل ظهر اللي اكتشفته شركة إيني الإيطالية سنة 2015 مكنش مجرد حقل غاز ده منجم دهب للطاقة الحقل ده لوحده فيه حوالي 30 تريليون قدم مكعب من الغاز الطبيعي. ولما الإنتاج بدأ سنة 2017، مصر كانت على وشك تحقيق حلمها في الاكتفاء الذاتي من الغاز.

لكن زي ما دايمًا بيحصل.. الطريق مش كله سهل. الإنتاج قل بشكل ملحوظ خلال السنين اللي فاتت بسبب تحديات في عمليات الحفر وصيانة الآبار. وده أثر بشكل مباشر على شبكات الكهربا اللي بيعتمد تشغيلها بنسبة كبيرة على الغاز.. وبدأنا نحس بأزمة لكن الأخبار الحلوة وصلت أخيرًا الحكومة أعلنت إن حقل ظهر هيرجع ينتج بكامل طاقته مع نص سنة 2025.

طب ليه اعلان الحكومة ده مهم جدا؟

لأن الإنتاج الكبير من حقل ظهر هيغير قواعد اللعبة.. مش بس للكهربا لكن لكل الاقتصاد المصري.. أولًا الكهرباء.. عارفين إن توفير غاز محلي لمحطات الكهربا يعني إنهاء مشكلة الانقطاعات وتثبيت الشبكة.. وده معناه مش بس راحة للمواطن لكن كمان دعم لكل الصناعات اللي كانت بتعاني بسبب نقص الطاقة

تانى حاجة..  الغاز اللي هننتجه هيخلينا نوقف استيراد الغاز المُسال اللي كان بيكلف الدولة مليارات الدولارات.. وبدل ما ندفع فلوسنا لبلاد تانية هنقدر نوفر العملة الصعبة ونعيد استثمارها في مشروعاتنا

تالت حاجة..  وهنا بقى النقطة اللي هتشعرك بالفخر|,, الغاز ده مش هيقف عند حدود مصر.. إحنا بنتكلم عن تصدير الغاز الطبيعي لأوروبا خصوصًا في ظل أزمة الطاقة العالمية.. أوروبا بتدور على بدائل للطاقة ومصر بموقعها الممتاز وشبكاتها جاهزة تمامًا إنها تلعب دور المورد الأساسي

طب إيه اللي بيتعمل دلوقتي علشان نرجع للإنتاج الكبير؟

الحكومة شغالة مع شركة إيني وشركاء الحقل على حفر آبار جديدة..و لحد دلوقتي تم استثمار حوالي 12 مليار دولار في الحقل ومتوقع الرقم ده يوصل لـ15 مليار خلال السنين الجاية وأعمال الحفر للبئر رقم 20 شغالة على قدم وساق باستثمار 70 مليون دولار.. ومتنساش كل ده بيحصل مع تسوية المتأخرات اللي كانت على الحكومة لشركات الإنتاج ودي خطوة هتساعد إن الشركات دي تضخ استثمارات أكتر

وعلشان نكون محددين أكتر الإنتاج المتوقع من حقل ظهر بعد التوسعات هيوصل لـ2.3 مليار قدم مكعب يوميًا..و ده رقم ضخم جدًا هيحط مصر في مكانة قوية على خريطة الطاقة العالمية