شركة النصر لصناعة السيارات كانت واحدة من اهم شركات تصنيع السيارات في العالم مش في مصر، ومع عودتها متوقع يكون في انخفاض كبير من اسعار العربيات في مصر.. ياتري سعر العربية لشركة النصر هيوصل لكام.. ومتوقع تبدا تنتج اول عربيات أمتي

الحكومة اعلنت رسميا عن عودة دوران الانتاج بشركة النصر لإنتاج السيارات ورئيس مجلس الوزراء الدكتور مصطفي مدبولي لما اتسال يوم عودة تشغيل المصنع عن احساسه بعودة الانتاج في واحدة من اهم شركات تصنيع العربيات في مصر والشرق الأوسط واللي كانت من أول اوائل شركات تصنيع العربيات في العالم، في اللحظة دي رد الدكتور مصطفي مدبولي وقال والله الليلة عندنا عيد.

طيب ليه رئيس الوزراء كان فرحان قوي بعودة تشغيل مصنع النصر للسيارات؟.
علشان نفهم سبب فرحة رئيس مجلس الوزراء بالخطوة دي لازم نعرف أن مصر بتدفع رقم ضخم جدا لتوفير احتياجات السوق المصري من العربيات وقطع غيارها ومستلزماتها والاكسسوارت اللازمة ليها، والرقم ده جاي عكس توجيهات القيادة السياسية للحكومة بالعمل علي تقليل فاتورة الاستيراد وزياجة فاتورة التصدير، خصوصا ان تشغيل المصنع هيكون بداية خطة الحكومة لترشيد استهلاك العملات الأجنبية خصوصا الدولار في استيراد العربيات وقطع الغيار اللازمة ليها واللي اغلب الموجود منها في السوق المصري بيكون استيراد من الخارج، وهيكون انتاج المصنع موجهة بشكل كبير جدا لسد حاجة السوق المحلي وكمان التصدير للخارج يعني هنوفر الدولار اللي كنها بنشري بيه عربيات وقطع غيار لها وكمان هنصدر منه للخارج بالدولار.
شركة النصر كشفت عن موعد طرح أول عربية ملاكي من إنتاج مصانعها واللي هيكون في شهر مايو 2025، وقالت أنها هتفتح باب الحجز على العربيات الجديدة قبل موعد الإنتاج بثلاثة أشهر تقريبا.
شركة النصر قالت أن الطرح الجديد بتاعها هيكون موجه لسد احتياجات السوق المحلية والإقليمية وهتكون العربيات الجديدة بمحركات تعمل بالبنزين ده غير طرح أنواع تانية كهربائية، وده هيوفر خيارات كتيرة للعملاء وهيواكب التوجهات العالمية للسيارات الكهربائية الصديقة للبيئة.
الشركة قالت كمان، أن الخطة الموجودة للتشغيل بتستهدف البدء بطاقة إنتاجية هتوصل لـ 20 ألف عربية سنويا، وده بيعني تصنيع حوالي 250 عربية في اليوم بمعدل 10 عربيات في الساعة، وبالإنتاجية دي، هتصبح شركة النصر مركز إقليمي لصناعة العربيات في الشرق الأوسط، وهتوفر نسبة كبيرة من فرص العمل للشباب وهتعزز مكانة مصر في مجال تصنيع العربيات بأسعار منافسة، وكمان هتصدر نسبة كبيرة من منتجاتها للأسواق الإقليمية، وده هيساهم في زيادة الدخل القومي ورفع كفاءة قطاع الصناعات الثقيلة في مصر،
الشركة قالت كمان ان الخطة بتاعتها بتهدف لزيادة نسبة المكونات المحلية في العربيات المصنعة من 49% علشان توصل لـ 60%، والاستثمارات الأولية في المشروع هتوصل لـ 40 مليون دولار، وده غير أن في خطة كبيرة لزيادة الاستثمارات في المشروع في الوقت اللي جاي للتوسع في عمليات التصنيع .
طيب اسعار العربيات الكهربائية الجديدة لشركة النصر هتبدا من كام؟.
كل الخبراء أكدوا أن اسعار العربيات الكهربائية الجديدة لشركة النصر هتترواح من 300 الي 350 ألف جنية، خصوصا أن في نسبة كبيرة من مكوناتها هتكون من الانتاج المحلي وده هيقلل من الاعتماد علي المكونات الاجنبية وبالتالي هيكون سعرها اقل من الانتاج المستورد.