في اقبال كبير حصل من المواطنين والناس واللي عايزة تستثمر فلوسها في شهادات الادخار علي شهادات الـ27% واللي البنوك طرحتها في بداية 2024، بس عمرك سالت نفسك أية الغرامة اللي هتدفها لو فكرت تكسر الشهادة والفايدة اللي هتاخذها بعد كسر الشهادة هتوصل لكام.. لو عايز تعرف كل ده شوف التقرير  ده للآخر

الظروف الاقتصادية اللي كل الدول مرت بيها ومنهم مصر خلت الناس بقي عندها مخاوف كبيرة جدا من الاستثمار أن الوقت الحالي الاسعار كل يوم في حال، وطبعا سعر بكرة هيكون اعلي من سعر النهاردة، وبالتالي اي حد معاه قرشين وعايز يستثمرهم في اي مجال بقي يفكر ألف مرة قبل ما ياخذ القرار ده ولازم يكون حاسب حساباته كويس جدا علشان في الآخر ميرجعش يندم علي شقي عمره.
المخاطر اللي كلمت حضراتكم عليها من شوية، خلت الناس تدور علي مكان آمن ومستقر ويكون مطمئن فيه علي شقي عمره، وطبعا مفيش احسن من شهادات الأدخار وخصوصا شهادة 27% واللي طرحتها البنوك، واللي كان عليها اقبال كبير جدا من الناس خصوصا أن الشهادات بيكون المواطن عارف هيكسب كام وامتي ومعاد فك الشهادة وكل التفاصيل الخاصة بيها، وكمان مش هتشيل هم أي مخاطر لارتفاع أو انخفاض أسعار في السوق، ولا محتاج يقوم بدري علشان يفتح باب رزقه، ولا هيدفع ايجار ولا مرتبات ولا اي حاجة، كل اللي بيعمله أنه يروح في البنك يشتري الشهادة وبيعرف مدتها اية وموعد استحقاقها وموعد ردها والفايدة بتاعتها هتوصل لكام.
طيب اية الغرامة اللي هيدفها المواطن لو كسر الشهادة والفايدة بتاعته هتوصل لكام في الوقت ده؟.
بنك مصر أعلن عن تفاصيل وشروط كسر  الشهادات ، واولهم أن يكون مر علي شراء الشهادة فترة 6 أشهر من اليوم التالي لشرائها، وغرامة كسر الشهادات في بنك مصر بتتراوح بين 70 و85% من إجمالي  الأرباح اللي تم صرفها للمواطن . 
بنك مصر حدد كمان علي موقعه الالكتروني خطوات كسر الشهادات وقال أنه ممكن للعميل كسر الشهادات عن طريق زيارة فروع البنك المنتشرة في كل محافظات الجمهوية والسؤال علي تفاصيل كسر الشهادة.
بنك مصر اتاح كمان للمواطنين امكانية كسر الشهادة من خلال التطبيق الخاص بالبنك، وده بيكون من خلال قيام المواطن بتحميل التطبيق الخاص بالبنك علي الهاتف الخاص للعميل، وتسجيل البيانات الشخصية له، والضغط على تعديل الشهادات المتواجدة على الصفحة الرئيسية للتطبيق.، واختيار كسر الشهادة الخاصة بالعميل، وبعدين هيضغط على التأكيد بعد الاطلاع على جميع المعلومات والغرامة الخاصة بالشهادة، وفي النهاية البنك هيبعت للعميل رسالة بتنفيذ عملية كسر الشهادة.